广播专辑 周立波海派清口4 打桩模子

广播专辑 周立波海派清口4 打桩模子 打桩模子就是搿个辰光出来个。上海个打桩模子绝对是有特色个。全上海所以个打桩模子噢基本浪向一个老师教出来个。大概要么是同饮浦江水啊？！叫一方水土养一方人。哎伊拉呒没介整齐噢！！喏打桩模子娜回忆一下。原来刚刚出来个打桩模子，衣裳基本浪是统一个。只有两种颜色。要么是绿颜色个一套，要么是蓝颜色个一套，侪大咯咯，大咯咯。葛末，下头呢着双布鞋。对伐？葛末就讲人么手一直插辣袋袋里，打桩模子。打桩模子眼神也统一个。伊只眼神没焦点个。就比方侬人辣前头噢。伊勿正视侬个。眼神是闪个。伊比方讲伊看侬，侬人辣搿搭，伊因为分分钟钟准备老派来捉伊侬晓得伐？！乃末打桩模子走路样子也像一个老师教出来个。阿拉正常人对伐正常人是大腿带动小腿。打桩模子勿是个，打桩模子是膝盖带动小腿，而且对伐伊搿膝盖是让小腿踢出去。娜听得懂伐？哪能走路？我走拨娜看对伐？！娜看像伐？ （...周立波模仿打桩模子走路.....)哪能意思啦侬？哪能意思啦侬？朋友侬帮帮忙噢侬？侬帮我豁胖唠？侬帮我豁帅唠？侬帮我豁大唠？豁米唠？朋友帮帮忙噢侬？啊是打桩模子搿恁啊？乃末呢伊拉哪能打桩个呢娜晓得伐？哪能打桩像伊拉打香烟搿也叫打桩。打侨汇券也叫打桩。葛末搿个辰光打桩模子伊贩外烟，通过走私渠道伊迭个香烟进来了。进来仔末打桩模子噢摆香烟也有套路个。蹩脚个香烟，就是打桩打外烟啦，蹩脚个香烟伊摆了下侧路，搿搭叫内侧袋，乃末良友唠世平唠摆辣下头个，啥个箭牌万宝路唠摆辣内侧袋里向，有种香烟打光以后对伐，伊拉拿国产个金花当箭牌打，拿醒宝当万宝路卖，立辣打桩。乃么伊拉基本浪蹲辣活动区域辣啥个地方呢？比方讲老大昌啊？新元昌啊？凯瑟琳啊上咖搿种地方，因为为啥？因为里向有交关元宵模子。 打桩模子帮元宵模子属于讲是一个种，但是分开个。打桩模子打桩，元宵模子钓马个？搿个辰光谈谈生意个唠啥。哎，上海搿帮元宵模子绝对有特色个。比方讲伊一点半蹲辣老大昌进去，蹲点，到五点半就点一杯咖啡。而且搿杯咖啡噢侬一直看到伊辣辣吃，但是总归吃勿光个。我想哪能桩事体？我就偷偷叫去看，一看，拨我看出来个。伊拉咖啡是搿恁吃个，就是讲伊拉是吃半口吐一口，有两个吐了勿好个吐得泡泡也吐出来了。葛唠一下班日搿恁吞进吐出对伐，基本可以拿清咖吐成卡布基诺。 葛末打桩模子呢就进去打香烟了。葛末伊拉打香烟是搿恁打个噢。啪跑进去，打桩模子一般性是啪进去打好桩就跑出来个。里向勿大蹲个。搿恁走个。朋友外烟要伐？外烟要伐？外烟要伐？外烟要伐？比方讲侬叫：哎，朋友，帮我来包外烟？打桩模子腔调是搿恁个，因为为啥？因为伊勿晓得侬是拿蹩脚个还是拿好个。“朋友吃啥个牌子啦？”伊勿看侬个。“朋友，啥牌子啦？”“来包万宝路”，“朋友大户嘛？朋友内侧烟“啪拿好。打桩模子伐呒没皮夹子个，欢喜一大叠十块五块头一刀用橡皮筋扣好，找头拨侬绝对大户噢。下趟要香烟来寻我好伐朋友？！外烟要伐，外烟？ 我搿个人比较有好奇心。我辣想为啥道理要叫伊拉叫打桩模子。葛末我就去问了一个资深个打桩模子。哎，我我我讲我讲阿阿哥啊，人家为啥要叫娜打桩模子呢？ “立波我讲拨侬听。”打桩模子讲闲话吃字个。“立波我讲拨侬听。打桩模子基本浪进去打一圈就出来，阿拉蹲辣室外个叫打桩模子。”葛末蹲辣室外为啥叫打桩模子呢？“朋友，侬看呀，阿拉一套子弹裤着好。”伊拉叫搿个子弹裤。“阿拉子弹裤着好，阿拉手塞辣辣袋袋里，外头厌气伐啦？人总归抖抖个老要。搿个像房子打桩头伐啦？搿个就叫打桩模子”。打桩模子个出典就是搿恁来个。我讲拨娜听，我有一次差点拨一个打桩模子吃生活。辣华侨商店门口，我碰着一个打桩模子，我差点拨伊吃生活噢。哪能桩事体晓得伐？华侨商店门口勿是侪是打桩模子嘛？葛末我正好路过，结果一个打桩模子对伐辣辣伊贩外币晓得伐？打外币。 “朋友，日币有伐？日币。日币啦，朋友，日币有伐日币。” 看到我，随后我辣走过来。 伊讲：“朋友日币有伐？” 我讲：日币么，侬要喊个呀。 “朋友，啥意思侬？” 我讲:“搿个就叫海蜇皮呀。” “朋友，侬白相我唠！！！侬覅跑，我斗侬人噢？”打桩模子奔个辰光手还插辣里向。伊搿个叫腔调侬晓得伐？“朋友侬帮帮忙噢侬。” 娜慢慢叫回去娜辣路上自家试试看。绝对有难度个噢。打桩模子蛮有劲个。